विश्राम

हिउँदमा आफ्नो चीसो घर छोडेर

न्यानो खोज्दै

हजारौं मीलको यात्रामा हिंडेको

सानो चराले

घाममा रापिएर निसासिएर

एउटा घरको तातेको बार्दलीमा

राखेको शीतल पानीको भाँडा

बीच आकाशबाट देखेर

केहि छिनको लागि तल झरेर

पानीमा डुबुल्की मार्दै

छिटाहरु छर्दै

थोपा थोपा साँचेर

पानी पिए जस्तै

जिन्दगीको यात्रामा

म केहि बेर सास फेर्छु

चराले हजारौं मील उड्नु

अझै बाँकी नै छ

र जिन्दगी मेरो पनि सिङ्गै बाँकी नै छ

दुई घुट्कोले उडान भिजाउनु छ

दुई पलले जिन्दगी

सुवासित बनाउनु छ